February 6th, 2011

В Суздале

молитвы блаженной Ксении Петербургской молитвы блаженной Ксении Петербургской

молитвы блаженной Ксении Петербургской


Тропарь:
Нищету Христову возлюбив, / ты небесною трапезой ныне наслаждаешься; / безумием мнимым безумие мiра обличив, / смирением крестным силу Божию ты приняла. / Потому дар чудодейственной помощи стяжавшая, / Ксения блаженная, моли Христа Бога / да избавит нас от всякого зла покаянием.

Глас 8-й

Песнь 1

Ирмос: Воду прошед, яко сушу, и египетскаго зла избежав, израильтянин вопияше: Избавителю и Богу нашему поим.

Припев: Святая блаженная мати наша Ксение, моли Бога о нас.

Водою крещения омывшися, первороднаго греха избавилася еси, мати Ксение, и наша сердца слезами покаяния очисти, просвещение подающи почитающим святую память твою.

Святая блаженная мати наша Ксение, моли Бога о нас.

В воде крещения змия лукава потопившая, житием твоим страдальческим вражию силу умертвила еси, блаженная, от неяже и нам избавитися Спаса умоли.

Слава: Воду живую неистощимых даров подаде тебе Христос, блаженная мати, Егоже нищету вольно возлюбила еси.

И ныне: Воды покаяния подаждь ми, Пречистая, и, очистивши мя от нечистоты греховныя, чиста представи, Богородительнице, Сыну Твоему и Богу.

Песнь 3

Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, Едине Человеколюбче.

Святая блаженная мати наша Ксение, моли Бога о нас.

Небеснаго круга Зиждителю все житие твое отдавши, возлюбила еси Того до конца, сподоби и нас молитвами твоими, блаженная, любити Господа до конца дний наших.

Святая блаженная мати наша Ксение, моли Бога о нас.

Небесная жизни желая, в житии твоем вся земная пренебрегла еси, сподоби и нас, мати Ксение, молитвами твоими небесныя жизни достигнути.

Слава: Небеснаго чертога желающи, странническое житие прешла еси, и ныне со всеми святыми в небесных чертозех ликуеши.

И ныне: Небеснаго Творца, Богородице Всепетая, рождши, небес пространнейшая явилася еси. Нас от пространнаго пути погибельна уклоньши, на небесный путь настави, молимся.

Седален, глас 5-й

Яко странница во граде святаго Петра явилася еси, благоволением Божиим укрепляема, мати премудрая, Божественных даров и чудес удостоившаяся. Темже, имущи дерзновение ко Христу Богу, мир испроси душам нашим и велию милость.

Песнь 4

Ирмос: Услышах, Господи, смотрения Твоего таинство, разумех дела Твоя и прославих Твое Божество.

Святая блаженная мати наша Ксение, моли Бога о нас.

Услышавши, Ксение, яко небеса поведают славу Божию, отвергла еси суету мирскую и в подвизе поста и лишения на земли Бога славити возжелела еси, Егоже славити и нас сподоби.

Святая блаженная мати наша Ксение, моли Бога о нас.

Услышавши и уразумевши дела Господня, прославила еси Его Божество, надеждою и любовию к Нему украсивши душу твою, подвигами благочестия просветилася еси, блаженная, Божиею силою укрепляемая.

Слава: Услышавши прещения вражеская и всякие козни от них терпящи, непоколебима пребыла еси, и нас непоколебимых в добродетелех утверди.

И ныне: Услыши, Пречистая Владычице, моления наша, и избави нас от насилия вражия, и глас Христов, призывающий благословенныя в Царство, услышати сподоби.

Песнь 5

Ирмос: Просвети нас повелении Твоими, Господи, и мышцею Твоею высокою Твой мир подаждь нам, Человеколюбче.

Святая блаженная мати наша Ксение, моли Бога о нас.

Просвещахуся вернии людие, зряще незлобие и кротость твою, мати Ксение, помози и нам, блаженная, подражати твоему незлобию.

Святая блаженная мати наша Ксение, моли Бога о нас.

Просветивши стезю жизни твоея светом Богоразумия, Христа Господа вседушне возлюбила еси, сподоби и ны, блаженная Ксение, в сем быти тебе подражатели.

Слава: Просвети нас, о мати Ксение, надеждою и любовию ко Господу, ныне бо зрящи Христа лицем к лицу, света неизреченнаго наслаждаешися, Тому за ны молися.

И ныне: Просветила еси омраченное естество, Богородице, Свет Истинный рождши, темже и нас Светом просветивши, от мрачных враг свободи.

Песнь 6

Ирмос: Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.

Святая блаженная мати наша Ксение, моли Бога о нас.

Молитву, яко источник приснотекущий, ныне изливаеши, недужныя исцеляющи, крепость и силу страждущим подающи, сподоби и нас молитвами твоими избавитися от всяких лютых.

Святая блаженная мати наша Ксение, моли Бога о нас.

Молитвою небесною и по кончине твоей от недуг свобождаеши, целительнице безмездная, достойно хвалима еси на земли, молися о душах наших.

Слава: Молитву нашу приими, мати Ксение, да в честный храм твой приидем со тщанием и недугов душевных и страстей телесных исцеление скоро приимем.

И ныне: Молитвою Твоею всемощною, Пречистая, избави нас враг видимых и невидимых, от грехов и всякия муки, яко рождшая Человеколюбца Бога.

Кондак, глас 3-й

Днесь светло ликует град святаго Петра, яко множество скорбящих обретают утешение, на твоя молитвы надеющеся, Ксение всеблаженная, ты бо еси граду сему похвало и утверждение.

Икос

Како возмогу, грешный аз, скверный душею и телом, поведати еже во плоти равноангельное житие твое и преславная чудеса? Аще убо мнози премудрии не дерзают исповедати многаго твоего терпения и смирения и теплыя ко Христу любве, но обаче надеяся на твое заступление, о блаженная, вопию ти: радуйся, яко везде призывающих тя скоро предваряеши, радуйся, яко множество скорбящих обретают тобою утешение, радуйся, святая блаженная мати Ксение, граду сему похвало и утверждение.

Песнь 7

Ирмос: Отроцы еврейстии в пещи попраша пламень дерзновенно и на росу огнь преложиша, вопиюще: благословен еси, Господи Боже, во веки.

Святая блаженная мати наша Ксение, моли Бога о нас.

Отроки еврейския Ангел от огня неопальны сохрани и тебе, Ксение, в странничестем житии укрепи, поющу: благословен еси, Господи Боже, во веки.

Святая блаженная мати наша Ксение, моли Бога о нас.

Детем евангельски подражала еси в житии твоем, стезю тесную прошедши в незлобии, темже и нас на подвиг добродетели сея укрепи, поющих: благословен еси, Господи Боже, во веки.

Слава: Отроком в пещи халдейстей подражающи, Ксение,
воспевала еси Христа, давшаго ти крепость, темже и мы, чтуще тя, блаженная, со дерзновением зовем: благословен еси, Господи Боже, во веки.

И ныне: Отроковице Дево, простри на нас милость Сына Твоего, да кромешныя тьмы избавимся мольбами Твоими, поюще: благословен еси, Господи Боже, во веки.

Песнь 8

Ирмос: Победители мучителя и пламене благодатию Твоею бывше, заповедем Твоим зело прилежаще, отроцы вопияху: благословите, вся дела Господня, Господа.

Святая блаженная мати наша Ксение, моли Бога о нас.

Победительница страстей явилася еси, Ксение, лютая искушения вражия побеждающи и непрестанно поющи: благословите, вся дела Господня, Господа.

Святая блаженная мати наша Ксение, моли Бога о нас.

Побеждающи всякия страсти греховныя, ты, блаженная, яко светла звезда явилася еси, приводиши бо жены, падшия во грехи, во еже целомудренно жити и в покаянии воспевати: благословите, вся дела Господня, Господа.

Слава: Победительница греха явилася еси, блаженная мати, благодать Вышняго имущи. Темже небесная достигла еси, идеже ныне со Ангелы поеши: благословите, вся дела Господня, Господа.

И ныне: Победе во бранех духовных верным пособствуеши, Пресвятая Дево, темже и людем града нашего помощь Твою низпосли, да Тя выну поем: благословите, вся дела Господня, Господа.

Песнь 9

Ирмос: Воистинну Богородицу Тя исповедуем, спасеннии Тобою, Дево Чистая, с безплотными лики Тя величающе.

Святая блаженная мати наша Ксение, моли Бога о нас.

Воистинну разум Христов имела еси, Ксение, смирение, кротость, веру несумненну, надежду и любовь, яже к Богу, и нас сподоби, да с тобою Христа присно величаем.

Святая блаженная мати наша Ксение, моли Бога о нас.

Воистинну на тебе, Ксение блаженная, исполнися Христово проречение: претерпевый до конца, той спасен будет, ныне бо со всеми спасенными Христа присно величаеши.

Слава: Воистинну никтоже, притекаяй к тебе, блаженная мати, тощь благодати Божия отходит, еяже и нас исполни, да тя величаем.

И ныне: Воистинну Богородицу Тя, Дево и Мати Слова, ходатаицу сущую нам, Солнце Правды возсиявшую, вернии, единомудренно песньми величаем.

Светилен

Якоже солнце светоносно, возсия ныне, блаженная мати, память твоя, вся верныя веселящи, иже молитвенно взывают ти: молися прилежно спастися нам.

Молитвы:

О, святая всеблаженная мати наша Ксения! Обиды, поношения и насмешки Христа ради претерпевшая и за мужа твоего, без христианского напутствия скончавшегося, непрестанно молившаяся. Виждь тесноту души моея и скорбь о умерших без покаяния и причащения Святых Тайн сродниках и знаемых моих (имена) и умоли данною тебе благодатию Человеколюбиваго Владыку Христа Бога нашего, да простит им вся согрешения вольная и невольная, из глубин адовых да изведет их, от мучений лютых избавит и множеством милосердия Своего ко избранным Своим сопричтет их, идеже ты ныне в незаходимей сияеши славе, воспевая Премилосерднаго Творца во веки веков. Аминь.

О святая всеблаженная матерь Ксения! Под покровом Всевышнего жившая, ведомая и укрепляемая Богоматерью, голод и жажду, холод и зной, поношения и гонения претерпевшая, дар прозорливости и чудотворения от Бога ты получила и под сенью Всемогущего покоишься. Ныне святая Церковь, как благоуханный цвет, прославляет тебя. Предстоя на месте твоего погребения, пред образом твоим святым, как будто ты живая пребываешь с нами, молимся тебе: прими прошения наши и принеси их к престолу милосердного Отца Небесного, как имеющая дерзновение пред Ним; испроси прибегающим к тебе вечное спасение, на добрые дела и начинания наши щедрое благословение, от всяких бед и скорбей избавление. Предстань со святыми твоими молитвами пред Всемилостивым Спасителем нашим за нас, недостойных и грешных. Помоги, святая блаженная матерь Ксения, младенцев светом святого крещения озарить и печатью дара Духа Святого запечатлеть, отроков и отроковиц в вере, честности, богобоязненности воспитать и успехи в учении им даровать; болящих и немощных исцели, семейным любовь и согласие ниспошли, монашествующих подвигом добрым подвизаться удостой и от поношений огради, пастырей в крепости Духа Святого утверди, народ и страну нашу в мире и безмятежии сохрани, о лишенных в предсмертный час причащения Святых Христовых Тайн умоли. Ты – наша надежда и упование, скорое услышание и избавление, тебе благодарение воссылаем и с тобою славим Отца и Сына и Святого Духа, ныне и всегда, и во веки веков. Аминь.
http://azbyka.ru/bogosluzhenie/kanonnik/kanon35.shtml
http://pravznak.msk.ru/group_discussion_view.php?group_id=169&grouptopic_id=70