archpriest Andrey (chudo_iva) wrote,
archpriest Andrey
chudo_iva

Category:

Ин канон Ангелу Хранителю

На остатках зарядки попытаюсь запостить:
 
Канон Ангелу Хранителю
Его же краегранесие: Ангелу похвалу воспеваю присно.

Песнь 1
(глас 4)
Ирмос: Моря чермную пучину невлажными стопами  древний  пешешествовав Израиль,  крестообразныма  Моисеовыма рукама Амаликову силу в пустыни победил есть.
Святый Ангеле Божий, хранителю мой, моли Бога о мне.
Ангела воспою, светлаго Хранителя моея души, твердаго заступника и окормителя, светозарнаго предстоятеля у Престола Божия за окаянство мое.
Святый Ангеле Божий, хранителю мой, моли Бога о мне.
Наставниче мой Ангеле, буди всегда предстоятель за мя пред Господом, разоряя стену безбожия, окрест мене созидаемую.
Святый Ангеле Божий, хранителю мой, моли Бога о мне.
Глаголы живота вечнующаго  по вся дни поучают мя, яже ко благочестию буди наставником в заповедях Господних хранителю мой, святый Ангеле.
 
Песнь  3
Ирмос: Веселится о Тебе Церковь Твоя, Христе, зовущи: Ты моя крепость, Господи,  и прибежище, и утверждение.
Святый Ангеле Божий, хранителю мой, моли Бога о мне.
Ежечасно ко благочестию стопы моя направи,  Ты бо еси мое упование  и покров, и ограждение.
Святый Ангеле Божий, хранителю мой, моли Бога о мне.
Лицы святых присно молятся Богу, ты же,  святый Ангеле,  не престай молитися за мя.
Святый Ангеле Божий, хранителю мой, моли Бога о мне.
Уста моя и ум мой во злочестии оскверних, ныне, отрезвясь, ко Ангелу вопию: не отступая храни ум мой во благе.
Господи, помилуй – Трижды
Седален: Души и тела хранителю моему присно хвалу воспевая, ангела светла со умилением молю: не гнушайся скверны греховныя моея, обаче неотступно пребуди окаянству моему, наставляя на путь яже ко спасению.
Слава и ныне:
Богородичен: Дивнаго Богочеловека Пречистая Богомати, призри на мое смирение и милость Свою и Сына от Тебе рожденнаго низведи на недостойнаго раба Твоего.
 
Песнь  4
Ирмос: Вознесена Тя видевши Церковь на Кресте, Солнце праведное, ста в чине своем, достойно взывающи: Слава силе Твоей,  Господи.
Святый Ангеле Божий, хранителю мой, моли Бога о мне.
Приступая, скверный, ко Владыке, кий ответ воздам?  Токмо Ангела  заступника молю: помози ми на Суде Вседержителя.
Святый Ангеле Божий, хранителю мой, моли Бога о мне.
Осквернихся страстно, окаяннейший, паче скотски согрешив, к тебе, заступнику, вопию велегласно: умоли о мне всех Содетеля.
Святый Ангеле Божий, хранителю мой, моли Бога о мне.
Херувимов и Серафимов со всевоинством младший сослужителю, предстоя выну  пред Милосердным Господем, о моем моли недостоинстве.
 
Песнь  5
Ирмос: Ты, Господи мой, Свет в мир пришел еси, Свет Святый, обращаяй из мрачна неведения верою воспевающыя Тя.
Святый Ангеле Божий, хранителю мой, моли Бога о мне.
Велия греси пред Господем сотворяя выну, не  возмогаю оправдатися благими делами. Ангеле, ты мя направи ко благу.
Святый Ангеле Божий, хранителю мой, моли Бога о мне.
Ангела заступника непрестанно молю о предстательстве за мя, злочестиваго, пред Господем, да помилован буду в Господне пришествие.
Святый Ангеле Божий, хранителю мой, моли Бога о мне.
Лицы Ангелов трисвятая  деннонощно воспевают велегласно. Ты, Ангеле, за мя мольбу вознеси, да изменю свое злоустремление.
 
Песнь  6
Ирмос: Пожру Ти со гласом хваления Господи, Церковь вопиет Ти, от бесовския крове очищшися ради милости от ребр Твоих истекшею Кровию.
Святый Ангеле Божий, хранителю мой, моли Бога о мне.
Умиленную жертву мою Господу вознеси, пресвятый Ангеле, очисти мя Божественною благодатию, ты бо еси ходатай и заступник за мя даже до смерти.
Святый Ангеле Божий, хранителю мой, моли Бога о мне.
Величество Божия человеколюбия и благодать неистленную от Господа  мне преподай, Ангеле Божий, мой дивный хранителю.
Святый Ангеле Божий, хранителю мой, моли Бога о мне.
Осквернихся безбожными хотеньми и срамным сквернодейством, Ангела заступника тя молю: настави мя к Богу всегда устремлятися.
            
Песнь 7
Ирмос: В пещи авраамстии отроцы персидстей, любовию благочестия паче, нежели пламенем, опаляеми, взываху: благословен еси в храме славы Твоея, Господи.
Святый Ангеле Божий, хранителю мой, моли Бога о мне.
Сосуд Божия благодати себе самого аз осквернив, не имея спасения надежды молю тя,  Ангеле, спасение преподай ми от Бога Всемилосердого.
Святый Ангеле Божий, хранителю мой, моли Бога о мне.
Плачу и рыдаю, смерть предо мною предстоит, ты, Ангеле, прежде моея кончины к добродетели душу мою настави, да не буду изринут вон.
Святый Ангеле Божий, хранителю мой, моли Бога о мне.
Елей изливая на мя  Божия милосердия, не престай о мне молитися, да в веке будущем не лишуся  с Богом пребывания.
 
 
Песнь  8
Ирмос: Руце распростер,  Даниил львов зияние в рове затче, огненную же силу угасиша, добродетелию препоясавшееся, благочестия рачители  отроцы,  взывающе: благословите, вся дела Господня, Господа.
Святый Ангеле Божий, хранителю мой, моли Бога о мне.
Велию милость ми преподай, от Всемилостиваго мнозе  изливаемую, верныя люди приобщающую Божеству несказанному, яже во приснопребывание в Царстве Божием во славе Господней.
Святый Ангеле Божий, хранителю мой, моли Бога о мне.
Ангела пою всесветлаго, благочестия вернаго наставника, Хранителя моего и покровителя от треволнений житейских и от всяких скорбных обстояний, путеводителя вернаго  в горния обители.
Святый Ангеле Божий, хранителю мой, моли Бога о мне.
 Юдоль плача и обитель скорби суть моя земная, поне в грядущем вечнем животе радости и утешения сподоби нестареющейся Ангеле мой, всеусердный заступниче.
 
Песнь  9
Ирмос: Камень нерукосечный от несекомыя горы Тебе, Дево, краеугольный отсечеся, Христос, совокупивый разстоящаяся естества. Тем веселящеся Тя, Богородице,  величаем.
Святый Ангеле Божий, хранителю мой, моли Бога о мне.
Правды Солнца, единаго света Христа праведнаго служителя соделай мя, святый Ангеле,  приобщая Церкви Божией  своим твердым за мя молением.
Святый Ангеле Божий, хранителю мой, моли Бога о мне.
Руце простираю к тебе, мой бесплотный  благопоспешный предстоятелю, не отступи от моего окаянства, обаче сподоби от погибели вечной спастися.
Святый Ангеле Божий, хранителю мой, моли Бога о мне.
Истины   Божией  и славы Господней  сподоби, Ангеле,  Божественно таинственно приобщиться, да не буду отринут  в погибель за беззаконие.
Святый Ангеле Божий, хранителю мой, моли Бога о мне.
Света невещественнаго, Самаго Господа Христа в сердце мое введи, тамо всегда пребывания Его обитель сотвори, святый Ангеле.  
Слава: Троичен: Нас, недостойных,  моления, Трисвятый Господи, прими, никогдаже отвергаеши  сердца горящие любовию, яже ко Твоему Трисвятому Величеству.
И нын:. Богородичен: Оставление беззаконных согрешений подаеши молящим Тя,  Преблагая Богородице,  и помогаеши изнемогающим  от страстей, сего ради Тебе вси концы земли,  яко  Премилосердую величают.
Молитва
Милосердый и милостивый Боже, пророка Даниила во рве львином и мучеников Своих в темницах благодатию  не оставивый, но Ангела укрепляющего им пославый, славлю Твое милостивое ко мне смотрение, преклоняю  колена сердца своего пред величеством Твоея благости и смиренно прошу Тя: не отрини молитвы моея, но якоже апостолу Павлу Ангела мне посли, укрепляющего и наставляющего мя, окаяннейшего, на заповеди Божественныя Твоя. Достойное по делом своим приемлю, не посрами моего на Тя упования, но сотвори мя христианином, правошествующим путем заповедей Твоих. Ты бо еси упование всех христиан и вся содержаяй, Господь Иисус Христос, и Тя прославляем во веки, аминь.


Tags: молитва
Subscribe

  • Post a new comment

    Error

    default userpic

    Your IP address will be recorded 

    When you submit the form an invisible reCAPTCHA check will be performed.
    You must follow the Privacy Policy and Google Terms of use.
  • 5 comments