Канон молебный Богородице
Творение Андрея, пресвитера.
Его же краегранесие: Матери Божией венец словесия полагаю.
Песнь 1, глас 8-й
Ирмос: Воду прошед, яко сушу, и египетскаго зла избежав, израильтянин вопияше: Избавителю и Богу нашему поим.
Мати Божия, дивная Горнего Царства Царице, призри на наше моление и спаси нас, к Тебе молящихся.
Пресвятая Богородице, спаси нас.
Агнца Божия рождшая, дивная Агнице, воззри на нас, окаяннейших, помилуй нас, припадающих к Тебе.
Пресвятая Богородице, спаси нас.
Слава: Ты бо еси наша Ходатаице, Ты еси единое наше по Бозе упование, тщетно да не будет наше к Тебе моление.
И ныне: Егда предстанем пред Сыном Твоим на Судилище, буди нам Помощница и Заступительница, да не внидем в погибель вечную.
Песнь 3
Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желaний крaю, верных утверждение, едине Человеколюбче.
Пресвятая Богородице, спаси нас.
Разум и тело свои оскверних непрестанными падениями, ничтоже благое можем творити. Всеблагая Владычице, погубленныя наша пути к Богу исправи.
Пресвятая Богородице, спаси нас.
Истину глаголаше пророчески о Себе, ибо вся роды родов Присноблаженную славят, нашу хвалу, к Тебе приносимую, ныне услыши.
Слава: Богоотроковице, не буди нам праведное осуждение, обаче избави погибели милосердием Твоим.
И ныне: Облаче светлый дивнаго небесе, облаком светлым благодати Своея Ты нас покрый, греховную нашу скверну презреши.
Седален
Дево Всепетая, Славо Всеславная, даруй спасение нам недостойным. Токмо Тобою по Бозе возможем обрести живот вечнующий.
Песнь 4
Ирмос: Услышах, Господи, смотрения Твоего тaинство, разумех дела Твоя и прослaвих Твое Божество.
Пресвятая Богородице, спаси нас.
Живот наш сохраняющи, покаяния и исправления нашего чающи, потерпи на нас, ради Своего долготерпения.
Пресвятая Богородице, спаси нас.
Имаши благое о нас произволение, радостнотворную Владычицею явилася еси, темже Ти воспеваем, радуйся Богоблагодатная.
Слава: Единая Ты наша заступница, Богоотроковице, единое наше прибежище, не отрини нашего моления, обаче управи путие живота нашего еже ко благу.
И ныне: Имеяше твердое к Тебе упование, молим Тя, Всеблагая, милость сотвори с нами, паче бо Каина и Авессалома ниспали в бездну погибели.
Песнь 5
Ирмос: Просвети нас повелении Твоими, Господи, и мышцею Твоею высокою Твой мир подaждь нам, Человеколюбче.
Пресвятая Богородице, спаси нас.
Велие милосердие яви на нас, ничимже заслужили милость Твою, обаче смиренно молим Тя: не лиши нас, окаяннейших, благодати Твоея.
Пресвятая Богородице, спаси нас.
Ева первая имя свое посрамила еси, смерти естество наше приобщая, Ты же, Богомати, истинною Евою пребыла еси, живот нам вечный раждаеши.
Слава: Наше естество одебелевшее благодатию присно напояеши, Славная, темже вси роди земныя славят Твое крайнее человеколюбие.
И ныне: Елей милосердия на нас, Богомати, излей, милостиво живот вечный нам даруй, никтоже будет лишен Твоея благостыни.
Песнь 6
Ирмос: Молитву пролию ко Господу и Тому возвещу печали моя, яко зол душа моя исполнися, и живот мой аду приближися, и молюся, яко Иона: от тли, Боже, возведи мя.
Пресвятая Богородице, спаси нас.
Царице благая, не презри нашего окаянства, не отрини нашего моления, но скоро поспеши на помощь, яко Человеколюбица.
Пресвятая Богородице, спаси нас.
Сонмы ангелов почитают Твое премирное Величество, мы же, дивяся Твоей чистоте, яко достойную славы небесныя, величаем.
Слава: Лицы святых превозносят Тя, обаче, смирением облекшись, дерзновенно молишися о мире миру у Творца всяческих - Сына Твоего.
И ныне: Облак светлый и росу благодатную Тя исповедуем, твердое наше заступление и крепкое упование.
Кондак
Вся концы земли присно воспевают Тя, Благодатная, Ты же, приемши ангельское хваление, не возгнушалася еси и нашея похвалы. Призри на немощныя рабы Твоя и всегда моли Сына Своего избавити род человеческий погибели вечныя.
Песнь 7
Ирмос: От Иудеи дошедше отроцы, в Вавилоне иногдa, верою Троическою плaмень пещный попрaша, поюще: отцев Боже, благословен еси.
Пресвятая Богородице, спаси нас.
Велия милости, чистоты ради Своея, сподобилася еси, чисто нас сотвори пред Сыном Твоим.
Пресвятая Богородице, спаси нас.
Елицы во Христа крестихомся, облещися во славу Христову нам подобает, в сем да будет нам Богородица верная Помощница.
Слава: Скотски павши, житие свое во гресех препровождаем, обаче душею скорбя, токмо на Твою надеявся помощь, зовем: не остави, Владычице.
И ныне: Истины явилася еси истинная Мати, не остави нас в погибели пребыти, дарующая миру всемощное избавление
Песнь 8
Ирмос: Царя Небеснаго, Егоже поют вои Ангельстии, хвалите и превозносите во вся веки.
Пресвятая Богородице, спаси нас.
Якоже Давид, впадши во многия прегрешения, к Сыну Твоему взываем: помилуй нас, Боже!
Пресвятая Богородице, спаси нас.
Петрово покаяние видяше, поучаемся любовию приобщатися Божественному Сыну Твоему, по вся дни живота своего принося покаяние.
Слава: Оставление наших прегрешений у Сына Своего нам испроси, Ты бо еси милостивая и человеколюбивая Владычице.
И ныне: Ливан, злато и смирну древле волхвы к Сыну Твоему принесли еси, мы же, духом смирении, ничтоже Тебе принести возможем, токмо славим Твое к нам человеколюбие.
Песнь 9
Ирмос: Воистинну Богородицу Тя исповедуем, спасеннии Тобою, Дево чистая, с безплотными лики Тя величaюще.
Пресвятая Богородице, спаси нас.
Аможе аще не хощем, тожде творим, ныне к Тебе прибегая, молим: стопы наша ко благу исправи.
Пресвятая Богородице, спаси нас.
Глас покаянный ныне услыши, славное на врага Побеждение, изми нас от погибели вечныя к Сыну Своему приведши.
Слава: Ангельское житие отцы древлии препроводивше, славы Божественныя сподобишася. Мы же к Тебе, Богомати, молимся: и нас, скверных, заповеди Божии настави творити.
И ныне: Юность свою во гресех погубиша, скверна себе сотворили есмы, но поне к концу жития к обновлению нас приведи, все бо упование на Тя полагаем.
Молитва
Пресвятая Преблагословенная Господа Бога нашего Мати! Из глубины скорби своея взываю Ти: несть ми избавления, несть ми помощи людския. Не возможет и весь мир помощи ми, утешения и отрады не имам в сем земнем житии. Не могу от скорби своея возвести аз главу свою, вся земная и преисподняя, окрест мене обстоя, в пучину отчаяния ввергают мя. Заступи и помилуй, Владычице, мене, аще и грешен и недостоин милости Твоея, обаче Сына Твоего, в Тайнах Святых сущаго, в себе ношу. Не отрини смирения мольбы моея, но по милости Своей помози ми. Укрепи мя право шествовати путем спасения, даруй ми надежду благ вечных и, аще возможно, облегчи скорбь мою, да не буду отринут аз, недостойный, в своем молении, но да пребудет милость Твоя на мне во вся дни живота моего. Ты бо Милосердая Заступница рода христианскаго, и на Тя всю надежду Свою полагаю, Благая Царица Небеснаго Царствия, Покров и утверждение рода христианского во веки веков, аминь.
Дек.2001 – 1 янв.2002